Karlakór Hreppamanna - JSN Epic - Clean and polished business Joomla template by joomlashine.com
Jólahlaðborð
Kórfélagar voru greinileg ekki að baki dottnir eftir Karlakvöldið því þann 9. des. var haldið upp að Geysi í jólahlaðborð. Þátttaka kórfélaga og maka var góð því þar voru tæplega áttatíu manns á vegum kórsins. Má segja að allir hafi mætt sem höfðu löglega afsökun nema kannski Grétar Skúlason sem tók jólahlaðborð hjá Flúðasveppum fram yfir okkar og eru hans mál nú í skoðun hjá stjórn kórsins, svona heildstætt og verður að segja að vonir hans um að hreppa stöðu nótnavarðar hafa minnkað til muna.
Á Geysi voru þvílíkar kræsingar á borðum að undrun sætti má jafnvel líkja þeim við það sem var í boði á Karlakvöldinu. Þrátt fyrir góðan vilja kórfélaga og maka að klára allt sem borið var fram tókst það ekki að þessu sinni en það má vera að önnur atlaga verði gerð að þessum krásum síðar.
Labbi í Glóru sá svo um að hjálpa gestum við brennsluna eftir átið allt og eru allar líkur á að margir hafi náð af sér aukakílóum eftir þær æfingar og jafnvel komið léttari heim en þegar af stað var farið.
Síðasta æfing fyrir jól var svo haldin þann 13. des. og þar söng kórinn nokkur létt jólalög fyrir kvenfélagskonur sem voru þar með sinn árlega jóla(glöggs)fund. Á þessari æfingu voru þeim Edit og Gylfa Þorkelssyni færðar ostakörfur sem þakklætisvott fyrir þeirra framlag á Liszt-tónleikunum og allir mættir félagar sem voru á æfingunni fengu Liszt-tónleikadisk í jólagjöf frá kórnum.
Karlakór Hreppamanna vill óska öllum velunnurum kórsins nær og fjær gleðilegra jóla og góðs nýs árs.
Kátir voru karlar!
Vel heppnað Karlakvöld er nú að baki þar sem metþátttaka var. Annar bassi sá um allan undirbúning að þessu sinni og setti bæði leikþátt á svið og ýmis skemmtiatriði. Gísli Einarsson úr „Landanum“ var veislustjóri og er óhætt að segja að hann hafi staðið undir væntingum.
Að þessu sinni var feitt hrossaket í matinn með kartöflum og uppstúfi og meira að segja var grænmeti með, bæði grænar ora-baunir og rauðkál. Var öllu þessu gerð svo góð skil að varla var nægur afgangur til fyrir bassana og lá við stympingum um síðustu bitana. Er áætlað að milli 500 – 600 gr. hafi farið ofaní hvern gest af kjöti. Þessi samkoma er jafnan mikið tilhlökkunarefni fyrir kórfélaga jafnt sem gesti en líka ein mikilvægasta fjáröflunarleið kórsins.
Karlakvöldshátíð 11.11.11
Framundan er mikil gleðihátíð hjá kórnum. Komið er að hinni árlegu karlakvöldshátið kórsins sem án efa er með skemmtilegri viðburðum á Suðurlandi og gott ef ekki landinu öllu.
Kraftmikill söngur, gamanmál og jafnvel heilu leikþættirnir eru frumsamdir og fluttir þetta kvöld svo ekki sé minnst á matinn sem er ekki beinlínis úr smiðju Laufeyjar Steingrímsdóttur hjá Matvælaráði en mjög saðsamur og bragðgóður.
Kórmeðlimir bjóða með sér karlkyns vinum og ættingjum á þetta kvöld en ef einhver er ekki með tengsl inn í kórinn en hefur mikinn áhuga á að koma er um að gera að hafa samband við Aðalstein í síma 898 1591 og þar sem Aðalsteinn hefur afar gott hjartalag er aldrei að vita nema hann útvegi viðkomandi miða.
Auglýsing sem pdf.
Að lokinni tónleikaröðinni "Liszt í 200 ár"
Síðustu tónleikar kórsins í tónleikaröðinni „Liszt í 200 ár“ voru haldnir í Selfosskirkju 2. nóvember fyrir fullu húsi. Þetta verkefni var afar skemmtilegt og krefjandi. Lögin sem kórinn flutti á tónleikunum höfðu ekki verið flutt áður hér á landi í það minnsta ekki með íslenskum textum. Heiðurinn af textagerðinni og þýðingunum á Gylfi Þorkelsson félagi í kórnum.
Lög Franz Liszt voru óvenjuleg á sínum tíma og skera sig úr jafnvel enn þann dag í dag fyrir það að laglínan er síbreytileg og þannig eins og rússibani fyrir áheyrendur að hlusta á því það var alltaf eitthvað óvænt framundan og spennandi. Lögin voru engu að síður melódístk og falleg en einnig kröftug og áhrifarík. Þau voru því ekki alltaf auðlærð fyrir kórinn en síuðust smásaman inní haus kórfélaga og nú vilja þeir bara fá meira Liszt- eyrnakonfekt.
Til að gera lífshlaupi Liszt sem best skil var sett upp veggspjalda sýning með myndum og frásögnum úr lífi meistarans. Skoðuðu gestir sýninguna fyrir tónleika og í hléinu. En mest fræðandi og skemmtilegust voru þó kynningar Arndísar Bjarkar Ásgeirsdóttur, dagskrárgerðarmanns á RÚV. Hún gerði lífi og tónsmíðum listamannsins góð skil á lifandi og skemmtilegan hátt milli atriða. Kunnum við kórfélagar henni miklar þakkir fyrir hennar framlag.